Plas Mawr

Oes Elisabeth. Oes aur? Y Dadeni, Shakespeare…a Phlas Mawr. Trysor o oes Elisabeth – gwerth ei bwysau mewn aur. Y tŷ trefol gwychaf o’i gyfnod ym Mhrydain.

Roedd ei berchennog Robert Wynn, masnachwr dylanwadol uchel ei barch, yn arbennig o hoff o fawredd a lliw. Roedd hefyd yn hoff o westeia – ac yn ŵr hael! Ac yn goron ar y cyfan, tŷ crand a adeiladwyd rhwng 1576 a 1585 yng nghanol strydoedd coblog cul tref ganoloesol Conwy. Tŷ a oedd yn bodloni ei ddyheadau mawr.

Yr hyn sy’n arbennig o wych yw’r gwaith plastr addurniadol yn y neuadd, sydd bellach wedi’i ail-baentio yn ei liwiau llachar gwreiddiol. Mae pob rhan o’r tŷ yn creu argraff, o’r gwaith plastr ar y nenfydau i’r ffrisiau a’r gwaith coed gwych. Chwiliwch am y llythrennau ‘RW’ sy’n ymddangos yn yr arfbeisiau... rhag ofn i chi anghofio pwy oedd meistr y tŷ a’r gŵr oedd yn talu’r biliau.

Pe bai cyfoeth yn cael ei fesur yn ôl ffasiwn, roedd yr uchelwr hwn o Gymro a oedd wedi gweld y byd yn hynod gyfoethog.

Mae arddangosiadau aml-synhwyrol ar gael sy’n rhoi gwybodaeth fanylach am hanes Plas Mawr. Rydym yn eich argymell i fanteisio i’r eithaf ar ein technoleg sgrîn-gyffwrdd!

Am fwy o wybodaeth am bethau i'w gweld a'u gwneud yn yr ardal ewch i www.attractionsofsnowdonia.com/cymraeg